ውዳሴ አምላክ

 የዳዊት መዝሙር ፴፯ 

አቤቱ በቍጣህ አትቅሠፈኝ በመቅሠፍትህም አትገስጸኝ ፍላጾችህ ወግተውኛልና እጅህንም አጽንተህብኛልና፤ ከቍጣህ ፊት የተነሣም ለሥጋዬ ጤና የለውም፤ ከኃጢአቴም ወገን የተነሣ ለአጥንቶቼ ደኅንነት የላቸውም፤ ኃጢአቴ ከራሴ ፀጕር በዝቷልና እንደ ከበደ ሸክምም ከብዶብኛልና፤ከስንፍናዬ የተነሣ ቍስሌ መገለ በሰበሰም፤ ጐሰቈልኩ ፈጽሜም አረጀሁ፤ሁልጊዜ በትካዜ እመላለሳለሁ ነፍሴ ስድብን ተመልታለችና፤ለሥጋዬም ጤና አላገኘሁም፤ ፈጽሜም ታመምኩ ባለመከራም ሆንኩ፤ከልቤ ትካዜም የተነሳ ጮህሁ፤ ምኞቴም ሁሉ በፊትህ ነው፤ልቅሶዬም ከአንተ አይሠወርም ልቤ ደነገጸችብኝ ኃይሌም ተወኝ፤ የዓይኔም ብርሃን ፈዘዘ፤ወዳጆቼም ባልንጀሮቼም ባለጋራ ሆኑኝ፤ ከበው ጎተቱኝ፤ዘመዶቼም ተስፋ ቆርጠው ተለዩኝ፤ሰውነቴን የሚሿት ሁሉ ተበራቱብኝ፤መከራዬን የሚሹም ከንቱ ነገርን ይናገራሉ፤በሽንገላ ሊያጠፉኝ ዘወትር ይመክራሉ፤እኔ ግን እንደማይሰማ ደንቆሮ ሆንኩ፤አፉን እንደማይከፍት ድዳም፤እንደማይሰማ ሰው ሆንኩ፤ በመላሱም እንደማይናገር፤አቤቱ በአንተ አምኛለሁና፤አቤቱ አምላኬ ስማኝ፤ የጠላቶቼ መዘበቻ አታድርገኝ እላለሁ፤ሰኰናዬም ቢሰናከል አፋቸውን ይከፍቱብኛል፤ እኔንስ ሊገርፉኝ አቆዩኝ፤ ቍስሌም ዘወትር በፊቴ ነው፤በደሌን እናገራለሁ፤ስለ ኃጢአቴም እቆረቆራለሁ፤ጠላቶቼ ግን ጤነኞች ሆነው ይበረቱብኛል፤ በከንቱም የሚሉኝ በዙ፤ስለ በጎም ክፋት የሚመልሱልኝ፤እውነት ነገርንም በመከተሌ ይጠሉኛል፤እንደ ርኩስ በድን ጣሉኝ፤ አቤቱ አምላኬ ሆይ አንተ አትጣለኝ ከኔም አትራቅ፤አቤቱ የመድኃኒቴ አምላክ ሆይ እኔ ወደ መርዳት ተመልከት።

 ውዳሴ አምላክ ዘሐሙስ የንስሐ ጸሎት

 የማፈቅርህ አምላክ ሆይ በቤተ ክርስቲያን የቍርባን ሥርዓት ባደረግህ ጊዜ የፍቅርህ ብዛት የተገለጸ ነው፤ ነገር ግን ተገልጾልኝ ሳለ እንዲህ ላለ ፍቅርህ የሚገባ ፍቅር በኔ ልብ የለምና፤ እኔ መልካም ግብር የሌለኝ ታናሽ ፍጡር ስሆን አንተም ትርፍ ነገር የማትሻ ታላቅ ፈጣሪ ስትሆን ለኔ ምግብ እስክትሆን ድረስ ያደረግህልኝ ፍቅር እጅግ የሚያስደንቅ ሊናገሩት የማይቻል እንግዳ ነገር ነው። ዳግመኛም የኔ ልብ ይህንን ፍቅር እያወቀ እስከ ዛሬ ድረስ ከአንተ ጋራ ታላቅ ፍቅር አለማድረጉ እጅግ የሚያስጨንቅ ነው። ይህም ሲታወቅ ከዛሬ በፊት የሚረባኝን ነገር ትቼ የሚጎዳኝን ነገር እፈልግ ነበርሁና ለበጎነትህ ልክ መጠን የሌለው አንተን ስለ ፍጹም በጐነትህ ሳልወድህ ቀርቻለሁ። አንተንም ባለመውደድ እየኖርሁ አንተን አለአዋቂ አድርጌ በሰው ፊት ወዳጅህ ልምሰል። ጌታዬ ሆይ አንተን የማይወድ ሰው ተስፋ የሌለው ፍጹም ድኃ ነው እላለሁና እንዲህ ባለ ድንቁርናዬ እጅግ አዝናለሁ። ከእንግዲህ ወዲህ ግን ስለ በጎነትህ ብዛት በምትሠጠኝ ዘመን ሁሉ በፍጹም ልቤ በፍጹም ነፍሴ በፍጹም ኃይሌ እወድሃለሁ። ቢሆንልኝስ የኔ ፍቅር በመላእክትና በጻድቃን ፍቅር ልክ ሆኖልኝ እንደርሳቸው ብወድ በወደድሁ ነበር። ነገር ግን ፍቅሬ እንደርሳቸው ፍቅር ባይሆንልኝ በመመኘቴ ምክንያት የእርሳቸው ፍቅር ስለ እኔ ይሁንልኝ። አምላኬና ጌታዬ ሆይ እስከ ዛሬ ድረስ ሳልወድህ የኖርሁ ብቻ አይደለሁም። በዚህ ዓለም ላይ ብዙ ክፋት ያደረግሁብህ ነኝ። ስለዚህ ባንተ ፊት ቁሜ በታላቅ ኀዘን ክፋቴ ብዙ ነው እላለሁ። ዳግመኛም ኃጢአት በሠራሁ ጊዜ ካንተ ፈቃድ ወጥቻለሁና ከፈቃድህ በመውጣቴ እጅግ አዝናለሁ። ከኀዘኔም የተነሣ እጅግ እንዳለቅስ ዓይኖቼ የእንባ ምንጭ ሆኑልኝ በወደድሁ። አእምሮም ያለው ሰው በኃጢአቱ ምክንያት የሚያዝነው ኀዘን ሁሉ በእኔ ልብ ቢከማች በወደድሁ። እንግዲህ እንደምትሠጠኝ ኃይል እንደ ችሎታዬ አዝናለሁ። በፊትህም ቁሜ ኃጢአቴንና ክፋቴን የኃጢአቴንም ምክንያት እረግማለሁ። ጸጋህንም አጋዥ አደርጋለሁ። እስከ ጊዜ ሞት ወደ ረገምሁት ኃጢአት አልመለስም። ከኃጢአት ምክንያት እጠበቃለሁ። ለሐዋርያት (ለደቀ መዛሙርቶችህ) እንደገለጽህ የአምላክዊ ቃልህንም ትርጓሜ ዐውቀው ወደማትመረመር መለኮትህ እውቀት እንደ ተመለሱ ጌታዬ ሆይ የልቡናዬንና የኅሊናዬን ዓይን አብራልኝ፤ ክቡራት መጻሕፍትን አውቅ ዘንድ፤አቤቱ የትርጓሜአቸውን ምሥጢር ተረድቼ ትዕዛዝህን እንድሠራ ፈቃድህን እንድፈጽም የዕውራን ዓይን አብርተህየነፍስና የሥጋ ብርሃንን እንደሠጠኸው። ማቴ. ፱፥፳፯-፴፩ ዮሐ. ፱፥፩-፵፩ አቤቱ ለኔም እንደዚህ ያለ ስጦታን ስጠኝ፤ እውነተኛ ብርሃንንም አይ ዘንድ የልቡናዬን ዓይን አብራልኝ። አቤቱ ፈቃድህን ሠርቼ እንድፈጽም አድርገኝ።

ለምፅ የያዘውን የፈውስከው ያነጻኻው አንተ ነህ። ማቴ. ፰፥፪-፬ እኔንም እንደሱ ከአፍአዊውና ከውሳጣዊው ኃጢአት ለምፅ አንጻኝ። ጸሎቴንም አንጻልኝ ብሎ እንደለመነህና እንደ ሰገደልህ አንተም በቸርነትህ የጸሎቱን ዋጋ እንደ ሠጠኸው ጸሎቴም እንደዛ እንደ ለምጻሙ ጸሎት ትሁን። ማር. ፩፥፵- ፬ አቤቱ ችግረኛ ጎስቋላ የምሆን እኔም ፈውስን ካንተ እሻለሁ። ጀርባዋ ለጎበጠች ሴት ወደ ምኵራብ በገባች ጊዜ እንዳዘንህላት ይህ ማሠሪያ ካንቺ ይቆረጥ ደዌያትም ካንቺ ይራቁ እንዳልካት ፈጥና ድና ከቃልህ ሥልጣንና ከጌትነትህ ሁሉ እንዳደነቁ ሉቃ.፲፫፥፲-፲፫ በቸርነትህ ከኃጢአቴ ማሠሪያ ፍታኝ ያለ ነውር በፊትህ እመላለስ ዘንድ፤ የቀና አካልንም ስጠኝ። ለዘላለም ከሞትና ከሲኦል ማሠሪያ የተፈታሁ ልሁን። አሜን ይደረግልኝ። የነቢዩ የዳዊትን ንስሐ እንደ ተቀበልከው ጽኑ አወዳደቅ ከወደቀም በኋላ በነቢዩ በናታን እጅ እንደ አነሳኸው፤እግዚአብሔር ይቅር ብሎኻል ባለውም ጊዜ ለሥርየቱ ምልክት እንደ ሰጠኸው። ሳሙ.ካልዕ ፲፪፥፩-፲፭

የጠፋሁ ችግረኛ የምሆን እኔንም እንደሱ ይቅር በለኝ ታላቅ ኃጢአቴንም አስተሥርይልኝ ከወደቅሁትም ጽኑ አወዳደቅ አንሣኝ። ያለ አንተ የሚያነሳኝ የለምና፤ እኔ ችግረኛ ነኝና፤ እንደ ናታን ከወደቅሁበት የሚያነሣኝ የለም። የናታን ጌታ ሆይ እኔ ግን በቸርነትህ እታመናለሁ ሰውነቴንም ከፊትህ እጥላታለሁ፤የነቢያትም የአማላጆችም ጌታ አንተ ነህና ከድቀቴ አንሣኝ። በደሌንም ተላለፋት፤ ስለ በደሌም ቸል አትበለኝ። አቤቱ ጌታዬና አምላኬ ኢየሱስ ክርስቶስ ሆይ  ዘመኔም እስኪፈጸም ከኃጢአት ጠብቀኝ። እድናለሁ የማለት ተስፋን የቆረጠ የሕዝቅያስን ጸሎት ተቀብለህ በኢሳይያስ ቃል ብዙ ዘመንም እንደሰጠኸው ኢሳ.፴፰፥፩-፮ ችግረኛ ለምሆን ለኔም እንዲሁ አድርግልኝ። ለዘላለሙ የምትኖር ሆይ ከዘላለሙ ጉዳትና ከኀጢአት ሞት አንስተህ ሞት በሌለበት በመንግሥተ ሰማያት ሕይወትን ስጠኝ። በሰው ልጅ ያልተሠራች ለዘላለም በምትኖር ጥፋት በሌለባት በላይኛይቱ ማደሪያ። ጌታዬ ሆይ ለዘላለሙ ከዚይ አልታኖረኝ እወዳለሁ። አሜን ይደረግልኝ። ከፀሐይ መውጫ እስከ መጥለቂያዋ ያሉ የጻድቃንን የነቢያትን ጸሎት እንደተቀበልህ የጸሎታቸውን ዋጋ ለነፍሳቸውና ለሥጋቸው ሕይወት የዘላለም ተድላን እንደሠጠኻቸው አውቀውም ሳያውቁ ተችሏቸው ሳይቻላቸውም የሠሩትን የተሠወረውንና የተገለጸውን ኃጢአታቸውን ይቅር እንዳልኻቸው፤ ጌታዬ ኢየሱስ ክርስቶስ ሆይ ችግረኛ የምሆን እኔንም የተገለጸውንና የተሠወረውን የሠራሁትን ኃጢአቴን ሁሉ ታቃልልልኝ ዘንድ ሥርየትን ከአንተ እሻለሁ። ታላቅም ቢሆን ታናሽም ቢሆን እኔንም ባሪያህን እንዳገለገሉህ አድርገኝ፤ አንተንም በምጠራበት ሁሉ ጸሎቴን ተቀበለኝ ከወዳጆችህም ጋራ በማያልፍ ደስታ በባለሟልነት እኖር ዘንድ የበቃሁ አድርገኝ። ለዘላለሙ አሜን ይደረግልኝ በእውነት።

የዳዊት መዝሙር ፶

አቤቱ እንደ ቸርነትህ ብዛት ማረኝ ይቅር በለኝ። እንደ ይቅርታህ ብዛት ኃጢአቴን ደምስስ። እጠበኝ ከኃጢአቴም አንጻኝ በደሌን እኔ ራሴ አውቀዋለሁና። ኃጢአቴም ዘወትር በፊቴ ነው። አንተን ብቻ በደልሁ። በፊትህም ክፉ አደረግሁ። በነገርህ እውነተኛ ትባል ዘንድ። በፍርድህም ታሸንፍ ዘንድ። በፍርድህም ታሸንፍ ዘንድ። እነሆ በኃጢአት ተፀነስኩ፤ እናቴም በኃጢአት ወለደችኝ። እነሆ እውነትን ወደሃልና። የማይመረመር ጥበብህን ንገረኝ። በስምዛ እርጨኝ እነጻማለሁ፤ እጠበኝ ከበረዶም ይልቅ እጠራለሁ። ኃሤትንንና ደስታን አሰማኝ፤ የሰበርካቸው አጥንቶች ደስ እንዲላቸው። ፊትህን ከኃጢአቴ መልስ። በደሌንም ሁሉ አጥፋ። አቤቱ ንጹሕ ልቡናን ፍጠርልኝ። የቀናውንም መንፈስ በውስጤ አድስ። ከፊትህ አትጣለኝ፤ ቅዱስ መንፈስህንም ከእኔ አታርቀው። በማዳንህ ደስታን ስጠኝ። በጽኑ መንፈስም ደግፈኝ። ለበደለኞች መንገድህን አስተምራቸው ዘንድ፤ሕግህን የሚዘነጉም ወደ አንተ ይመለሱ ዘንድ። የመድኃኒቴ አምላክ እግዚአብሔር ሆይ ከደም አድነኝ። መላሴም ጽድቅህን በመናገር ደስ ይለዋል። ከንፈሮቼን ክፈት አፌም ምስጋናህን ያወራል ብትወድስ መሥዋዕትንም በሰጠሁህ ነበር። የሚቃጠለውን መሥዋዕት አትወድም እንጂ። የእግዚአብሔር መሥዋዕት የዋህ ልቡና ነው። እግዚአብሔር ገርና ትኁት ልቡናን ይንቅም። አቤቱ በሞገስህ ጽዮንን አስጊጣት። የኢየሩሳሌም ቅጽሮችም ይታነጹ። እውነተኛውን መሥዋዕት መባውንም ቍርባኑንም በምትወድበት ጊዜ ያን ጊዜ ፍሪዳዎች በመሠዊያህ ይሠዋሉ።

ውዳሴ አምላክ ዘዓርብ ሥርዓተ አምኃ

አምላኬ ሆይ የምግባር ድኃ ነኝና ለአንተ የማቀርበው እጅ መንሻ የለኝም፤ ነገር ግን ጻድቃን በሚቆርቡበት ጊዜ የሚያቀርቡልህን ፍቅር ስለእኔ ሕይወት ለአባትህ ያቀረብኸውን ፍቅር እንደ እጅ መንሻ አድርጌ አቀርባለሁ። ለአንተ ሞትና ሕማማት መታሰቢያ እንዲሆን፤ለእግዝእትነ ማርያም ለጻድቃን ለወዳጆችህ ሁሉ። ለእኔም ጸጋ ስለ ሰጠህ ምስጋና አቀርብልሃለሁ። ከዚህም ሌላ ለእኔ ለኃጢአት ሥርየት የኃጢአት ፍትሐት እንድትሰጠኝ እለምንሃለሁ። በምሞትበት ጊዜ ጸጋህን እንድትሰጠኝ ተስፋ አደርጋለሁ።

ለእግዝእትነ ማርያም ጸሎት

ከንጹሓን ይልቅ ንጽሕት የኢየሱስ ክርስቶስ እናት ሆይ በአንቺ የተፀነሰን አምላክ እኔ ዛሬ የምቀበለው ነኝ። አንቺ የኢየሱስ ክርስቶስ እናት እንድትሆኝ ሌላ ኃጢአት በሰው ሁሉ የደረሰ የአዳም ኃጢአት ስንኳ አልደረሰብሽም። እኔ ግን ኃጢአት የሠራሁ ስሆን ያንቺን ኢየሱስ ክርስቶስን ልቀበል ወደ ቍርባን እቀርባለሁ። መሐሪት እናት ሆይ ክፋቴ ብዙ ነውና እርሱን ስቀበል እዲምረኝ እያዘንሽ አማልጂኝ የኔ መቀበል ክቡር ልጅሽን ማዋረድ መናቅ እንዳይሆን እርሱን ልጅሽን በምትቀበይበት ጊዜ የተደረገን የአንቺን መዘጋጀት ያንቺን ትሕትና ያንቺን ንጽሕና ስለኔ ፈንታ እንድታቀርቢልኝ እለምናለሁ። ጌታዬ ኢየሱስ ክርስቶስ ሆይ ፈልገህ ከቦታቸው ልታገባ ልትመልስ የመጣህ አንተ ነህ። የጐሰቈልሁ እኔንም ፈልገህ ከሚናጠቁ አንበሶች ወደምድንበት ያለ ድንጋጼም በጥላህ አርፌ ወደምኖርበት ወደማትፈርስ ቅጽርህ ልታገባኝ ምን ያህል ይገባህ ይሆን?አቤቱ በባሪያህ በዳዊት ቃል የጻድቅ ሞት በእግዚአብሔር ዘንድ ክቡር ነው ብለሃልና፤ ጌታዬ ሆይ በኃጢአት ከሚመጣ ሞት አድነኝ። ሕይወትና ሥርየትን ስጠኝ። በጎ ነገርን ለዘላለም አድርግልኝ። አቤቱ ይድን ዘንድ መመለሱን ነው እንጂ የኃጥኡን ሞት እንዳልወድ መሐላን ምያለሁ ብለህ በሕቅኤል አድረህ ተናግረህ ነበር። ጌታዬ ሆይ ለሚመለሱት የምትሰጣትን እንዲህ ያለችዪቱን ንስሐ ስጠኝ። አቤቱ ንስሐ ከማያሻቸው ከዘጠና ዘጠኙ ጻድቃን ይልቅ በአንድ ኃጥእ መመለስ በመላእክት ዘንድ ታላቅ ደስታ ይደረጋል ብለህ አንተ ተናግረሃል። ሉቃ.፲፭፥፬-፲ ጌታዬ ሆይ በመላእክት ዘንድ እንዲህ ያለ ደስታ እንዲደረግልኝ ይህቺን የምትመስል ንስሐን ስጠኝ። ጌታዬ ሆይ «ሸክም የከበዳችሁና የደከማችሁ ወደ እኔ ኑ እኔም አሳርፋችኋለሁ» ብለህ ተናግረሃልና። ማቴ. ፲፩፥፳፰ አቤቱ ወደ አንተ እንድመጣ መምጣቱን ስጠኝ ከኃጢአት ሸክም ታድነኝ ዘንድ የዘላለም እረፍትን ትሰጠኝ ዘንድ። አሜን ይደረግልኝ። ጌታዬ ሆይ «ኃጥአንን ለንስሐ ልጠራ ነው እንጂ ጻድቃንን ልጠራ አልመጣሁም» ብለህ ተናግረሃል። ማቴ. ፱፥፲፫ ጌታዬ ሆይ በደሌንና ኃጢአቴን ይቅር ትለኝ ዘንድ እኔን ኃጥኡን ባጠራርህ ወደ አንተ እንድመጣ አድርገኝ። ጌታዬ ሆይ በነፍስ ከተጎዳ ለሰው ምን የረባዋል ብለህ ተናግረሃል። ማቴ. ፲፮፥፳፮ ጌታዬ ሆይ ነፍሴን በፊትህ ገንዘብ እንዳደርጋት አድርገኝኝ። ጌታዬ ኢየሱስ ክርስቶስ ሆይ ጐስቋላ ድኃ የምሆን እኔን ይቅር በለኝ፤እኔ የረከስኩ ያደፍኩ ነኝ፤እኔ ዘማዊ ነኝ፤እኔ ክፉ ነኝ፤እኔ ጠማማ ነኝ፤ እኔ በኃጢአት የሰጠምኩ ነኝ፤ እኔ የጠፋሁ ነኝ፤እኔ የወደቅሁ ነኝ፤እኔ መንገድ የጠፋብኝ ነኝ፤እኔ የተናቅሁ ነኝ፤እኔ የተዋረድሁ ነኝ፤እኔ ስለ ክፉ ሥራዬ ያፈርሁ ነኝ፤በኔም ያለ ክፉ ሥራዬ ይህ ብቻ አይደለም። በደሌ ስለበዛ እጽፍ ይሆናል እንጂ። ክቡር ጌታዬ ሆይ እለምንሃለሁ ለጋስ ሆይ የሠራሁትን ታላቁን ኃጢአቴን ይቅር እንድትለኝ አንተ ታውቃለህና ከኃጢአት እድፍ ሁሉ አንጻኝ። ጌታዬ ሆይ እለምንሃለሁ ለኋላ መከራዬ በሠራሁት በጠላትነት ከተነሡብኝ ከጐተቱኝ ልብሴንም ከገፈፉኝ ወንበዴዎች ታድነኝ ዘንድ ከኔ የወሰዱትንም ገንዘብ መልስልኝ፤በርኅሩኅነትህም ዘይት ቍስሌን አድነኝ። አቤቱ ጌታዬ ሆይ በበጎ ይቅርታህና በክቡር መስቀልህ ሰይጣንን ፈጥነህ ከእግሬ በታች ቀጥቅጠው። አቤቱ በሥልጣንህ ኃይሉን አድክመው ሠራዊቱን በመላእክት ጐብኞች ከእኔ በትናቸው፤ከክፉ ኅሊናና ከመከራም ጠብቀኝ። እኔን ባሪያህን ከርኵስ ነገር ሁሉ ጠብቀኝ። ጸጥታንና በቦታ መወሰንንም ስጠኝ። የሰይጣንን ፈቃድ እንዳልሠራ በጠላቴ እጅ አትጣለኝ። ያ ነገረ ሠሪ እንደ ወደቀ እንዳልወድቅ እኔን ባሪያህን ተቀበለኝ። ወይንህንም ከጠበቋት ጋራ ቁጠረኝ። የምዕመናንን ሥራ ሠርቼ በአሥራ አንድ ሰዓት ዋጋ ካገኙ ጋራ ዋጋዬን እንዳገኝ። ማቴ. ፳፥፩- ፮ አቤቱ በጸራች የንስሐ ዕንባ እንዳገለገሉህ እንደ ወንበዴውና እንደ ቀራጩ እንደ ሴሰኛዪቱ አድርገኝ። አቤቱ የሚያረጋጋ የይቅርታ መልአክን እዘዝልኝ፤ አቤቱ የጠፋች የባሪያህን ነፍስ አድነህ ወደማታልፍ መንግሥትህ አግባት። የኃጥኡን መመለሱን ነው እንጂ ሞቱን የማትወድ ሆይ አቤቱ የሚያገለግልህ ልቡናን ስጠኝ። በአንተ አምኛለሁና ስለ ይቅርታህ ብዛት አንተን ፈለግሁ እንጂ ያለ አንተ ሌላ የፈለግሁት የለም። እኔ ድኃ ችጋረኛ ስለሆንኩ ዘወትር አዝናለሁ። በሥራዬም ምንም ምን ደስ አላሰኘሁህም። አቤቱ ከእንግዲህ ወዲህ የንስሐን መጀመሪያ ስጠኝ። በረድኤትህም ክበበኝ። ድካሜንም በክቡር መስቀልህ አጋዥነት አጽናልኝ። ራሴንም ከወደቅሁበት አንሣው። በሠራሁት በኃጢአቴ ብዛት አትቆጣጠረኝ። ከኃጢአቴ የሚያነጻኝ ከአንተ በቀር ሌላ የለምና ጠላት አስቶኝ እኔ በስንፍናዬ ያበላሸኋትን የወይንህን ቦታ አርማት፤ ኰትኵታት። ክብርት ጥምቀትህ ያነጻቻት ምድርህን አትተዋት አሜከላና አሾህ በቅሎባታልና። ነገር ግን የዕርቅን መልአክ ላከው ከሰይጣን ሥራና ከርኵስ ሁሉ ዳግመኛ ያነጻት ያጸራት ዘንድ። እግዚአብሔር ሆይ ጽኑ ኃያል ገናና አንተ ነህና ለአንተ ለዘላለም ክብር ይገባሃል። አሜን በእውነት። የዳዊት መዝሙር ፷፱ አቤቱ እኔን ወደ መርዳት ተመልከት፤ አቤቱ እኔን ለመርዳት ፍጠን፤ ነፍሴን የሚሿት ይጐስቁሉና ይፈሩ። በእኔ ክፉ የመከሩ ሁሉ ይፈሩና ወደ ኋላቸው ይመለሱ። እሰይ እሰይ የሚሉብኝ ያን ጊዜውን አፍረው ወደ ኋላቸው ይመለሱ፤ አቤቱ የሚሹህ ሁሉ በአንተ ደስ ይበላቸው ኃሤትም ያድርጉ። በጊዜው ሁሉ ማዳንህን የሚወዱም ዘወትር እግዚአብሔር ታላቅ ነው ይበሉ። እኔስ ችግረኛ ምስኪን ነኝ። እግዚአብሔር ግን ይረዳኛል። አቤቱ ረዳቴና መጸጊያዬ አምላኬ ሆይ አትዘግይ። 

ውዳሴ አምላክ ዘቀዳም ለጠባቂ መልአክ ጸሎት

የምትጠብቀኝ መልአክ ሆይ ዛሬ ወደ ቍርባን የምቀርብ ነኝና ቍርባንም ስለ ክብሩ ብዛት የሚያስፈራ የሚያስደነግጥ ሥርዓት ነውና እጅግ እፈራዋለሁ። ስለዚህ አንተ ተከተለኝ። ጌታዬን የሚገባ ልመና እንድለምነው፤አንተን ጌታዬን እንዴት እቀበልሃለሁ ይሆን እንዲል ለልቤ መንፈሳዊ ዕውቀትን አሳይልኝ። የኔ ልብ ካንተ ከዚህ ታቦት ዙሪያ ከሚቆሙ ከባልንጀሮችህ ልብ ጋር እንዲሆን የልብ ትሕትና የልብ ፍቅር አስተምረኝ። የምትረዱ ቅዱሳን ሁሉ ተከተሉኝ። ጠብቁኝ። በአብ ስም በወልድ ስም በመንፈስ ቅዱስ ስም አምናለሁ። መግደልና ማዳን በሚቻለው አመንሁ። ሞትና ሕይወት በእጁ ባለ አመንሁ። መንፈሳዊውንም ሕይወት በሚሰጠው አምናለሁ። በኪሩቤል ላይ በተቀመጠው አምናለሁ ምድርን ባያት ጊዜ እስከ መሠረትዋ እንድትንቀጠቀጥ በሚያደርጋት አምናለሁ፤አዳም ልጆቹንም በምሳሌው በፈጠራቸው አምናለሁ። አዳምና ልጆቹንም ለማዳን በመምጣቱ አምናለሁ። ከንጽሕት ድንግል ከእመቤታችን ሰው በመሆኑ አምናለሁ። «እኔ ትንሳኤና ሕይወት ነኝ» ባለው አምናለሁ። ዮሐ.፲፩፥፳፭ «የሕይወት እንጀራ እኔ ነኝ በእኔ ያመነ አይሞትም ቢሞትም እኔ አስነሳዋለሁ» ባለው አምናለሁ። ዮሐ.፮፥፴፭ ለፍጥረቱ ሕይወትን በሰጠ አምናለሁ። «እኔ በአብ እኖራለሁ አብም በእኔ ይኖራል፤እኔና አብ አንድ ነን» ዮሐ.፲፬፥፲-፲፩ ዮሐ.፲፥፴ በአለው አምናለሁ። ኃጥኣንን ወደ ንስሓ ይጠራ ዘንድ በመጣው ለፍጥረቱም ኃይልና ሥርየትን በሰጠው አምናለሁ። በጽሩይ ልቡና የሚለምኑትን በርኅራኄው ብዛት በሚቀበላቸው አምናለሁ። ሳይሳሳ በሚሰጥ አምናለሁ። ሥጋ ያለውን ሁሉ ልመና ሰምቶ ተስፋ በማያስቆርጥ አምናለሁ። ጌታዬ ኢየሱስ ክርስቶስ ሆይ ይቅር በለኝ። ይቅር ትለኝ ዘንድ ይቅርታህን አያለሁና ያለ አንተ ይቅር ባይ ባይኖር፤ጌታዬ ሆይ የቀኝ እጅህ ፍጥረት ነኝና ይቅር በለኝ። የንጹሓን እጆችህ ፍጥረት ነኝና ይቅር በለኝ። በደለኛ ኃጥእ የነበርሁ እኔ ላገለግልህ መጥቻለሁና ይቅርታህና ርኅራኄህ የበዛ ፈጣሪ ይቅር በለኝ። በፊትህ የበደልሁ እኔ በፊትህ ወድቄአለሁና በጎነትህ የሰፋ ጌታዬ ሆይ ይቅር በለኝ። የተጠመቁ ክርስቲያንንም ሁሉ ይቅር በላቸው። ጌታዬ ሆይ በርኅራኄህ ብዛት ይቅር በለኝ። ጌታዬ ሆይ በቸርነትህም ብዛት ይቅር በለኝ ለኃጢአቴ ሥርየት ስለሠራህልኝ ጥምቅቴ ይቅር በለኝ። ኃጢአታችን ሊሠረይበት እንበላው ዘንድ ስለሰጠኸን ስለ አምላካዊ ሥጋህ ይቅር በለኝ። የዘላለም መድኃኒትና ይቅርታን ስለ ሰጠህባት ስለ አዲሲቱ ሕግ አቤቱ እኔን ባሪያህን ይቅር በለኝ፤ ጌታዬ ሆይ ወደ ተወደደ ልጅዋ ይሰማል እንጂ ልመናዋ በማይነቀፍ ይቅር ባይ አማላጅ በምትሆን በእመቤታችን አማላጅነት ይቅር በለኝ። አቤቱ ጌታዬ ሆይ ስለኃጢአቴ ብዛት ይህን ከአንተ ለመቀበል ምንም የበቃሁ ባልሆን ይቅር በለኝ። የኃጢአቴንም ብዛት አትይ ያለ ንስሓ ኃጢአት የሚያስተሠርይ የለምና የኃጢአቴን እድፍ ከይቅርታህ ብዛት ጋር የምታጽብ አንተ ስለሆንክ። ለጋስ ሆይ ቸር ሆይ ይቅር በለኝ። ሰማይ ስንኳ በአንተ ዘንድ ንጹሕ አይደለምና የመላእክት ጭፍሮችም በአንተ ዘንድ ንጹሓን አይደሉም። ንጹሓን ባይሆኑ ከእርሳቸው ወገን ከመዓርጋቸው የተዋረዱ አሉና። ስለዚህ የፍጥረት ጌታ ሆይ በአንተ ዘንድ ንጹሕ የለምና ይቅር በለኝ እላለሁ። ጌታዬ ሆይ ይቅር በለኝ። ወራቴ በከንቱ አልፏልና ዘመኔም በከንቱ ተፈጽሟልና ወደ ሌላም ዘመን እንድመለስ ተስፋ የለኝም። ጌታዬ ሆይ ይቅር በለኝ። በዕዳ ተይዣለሁና ነፍሴን ከኃጢአት ማሠሪያ የማስፈታበት ገንዘብ የለኝምና ክፉ ሥራዬም በዝቷልና፤ ጌታዬ ሆይ ይቅር በለኝ። እነሆ መከር ደርሷልና አጫጆችም ከራስጌዬ ቆመዋልና ጌታዬ ሆይ ይቅር በለኝ። የወይን መቆረጫው ጊዜው ደርሷልና ወይኑ ግን ጮርቃ ነው አይረባኝምና ጌታዬ ሆይ ይቅር በለኝ። እነሆ በማያፈራው እንጨት ሁሉ ምሳር ተቃጥቷል ክፉ እንጨት የተባለውም አንተን የማገለግልበት በጎ ሥራ የሌለኝ እኔ ነኝና ጌታዬ ሆይ ይቅር በለኝ። እኔ ቸል ስል ሞት ደርሶብኛልና፤ ጌታዬ ሆይ እዘንልኝ ለመንገዴ ስንቅ የለኝምና መንገዴም እጅግ የራቀች የምታደክም ናትና፤ ምክንያትም ምላሽም የለኝም። ጌታዬ ሆይ ራራልኝ። መልእክተኛ ወደእኔ በመጣ ጊዜ እንዳያስቸኩለኝ ከዚህ ዓለም ለመሄድ የበቃሁ አይደለሁምና፤በምታስጨንቅ በመንገድም የሚያገኘኝን አላውቀውምና ጌታዬ ሆይ እኔ ግን የአንተን ረዳትነት ተስፋ አደርጋለሁ ያለ ይቅርታህም ተስፋ የለኝም፤ጌታዬ ሆይ ከርኅራኄህ አታሳፍረኝ። በድሎ ወደ አንተ በንስሓ የተመለሰውን አታሳፍረውምና፤ከመሐሪነትህና ከስጦታህ አታሳፍረኝ ከበዛች ለጋሥነትህም። ጌታዬ ሆይ ከመመካት አድነኝ ከኩራት አድነኝ፤ ከትዕቢት አድነኝ፤ልቡናን ከማሳደግ ራስንም ከፍ ከፍ ከማድረግ አድነኝ፤ ከቅናትና ከቂም ከሐሜትም ከባልንጀራም መፍረድ አድነኝ። አቤቱ ጌታዬ ሆይ ከታናሹም ከታላቁም ኃጢአት ሰይጣን ከሚያሠራው ሥራ ሁሉ አድነኝ። ሥጋንም ደስ ከማሰኘት አድነኝ፤ከጉዳትም አድነኝ። አቤቱ ከዳተኛ ወንጀለኛ ከሚሆን አምላካዊ ፍቅርንም ከሚጠላ ከባላጋራዬ ከዲያብሎስ እጅ አድነኝ። ጠላቴንም በእኔ አታሰናብተው ድል መንሳትንም አትስጠው፤ ድል በነሳ ጊዜ በእርሱ ኃይል ድል እንደሚነሳኝ አድርጎ እንዳይመካ ጌታዬ ሆይ በመዓልትም በሌሊትም በየጊዜው በየሰዓቱም ሁሉ ጠብቀኝ። ከክፉም ከርኩሱም ኅሊና ከሚያዋርዱና እንደ እሳት ከሚያቃጥሉም ተጠብቄ እንድኖር አድርገህ ትዕግሥትን ስጠኝ። በቦታዬም እንድኖር አድርገኝ። ሌባ እንዳይሰርቀኝ ከቦታዬም እንዳያናውጠኝ ገንዘቡ ጠፍቶበት ከወንድሞቹ እንደ ተለየ እንደ ባዕድ እንዳያደርገኝ በጠላቶቼ ፊት አትግለጠኝ። እንዳይስቁብኝና እንዳይዘባበቱብኝ የተሰወረ ኃጢአቴንም እንዳይገልጹብኝ በቦታዬ አጽናኝ እንጂ። መልካም ፍሬንም እንደ ምታፈራ እንደ ሰሌን ሥር ጽናት በልቡና ጽናትና በነፍስ ዝምታ በቦታዬ ትከለኝ። አቤቱ ጌታዬ ሆይ የነፍሴን ነገር እያሰብሁ በኃጢአቴ አለቅስ ዘንድ ልቡናዬ እንዳይታወክ ነፍሴን በመውጣት በመግባት ከአንዱ ወደ አንዱ መዞርን እንዳታደርግ። ይህም የሰይጣን ጦርነት ነው፤ ዘመኔም በሥራ ፈትነትና በዙረት እንዳይፈጸም። የዲያብሎስንም ኃይል ከሃሊነት ባለው ሥልጣንህ አጥፋው። እኔ ባርያህ በሥራው ሁሉ ደካማ ነኝና አባትና እናት እንደሌሉት ሕፃን በየጊዜው ሁሉ ወደ አንተ አንጋጥጣለሁ ባል እንደሌላት እንደ ተዋረደችም ሴት ደዌውም እንደ ጸናባት ድውይ በቍስል ላይ ቍስል እንደ ተጨመረበት የሚፈውሰውንም ባለ መድኃኒት እንደሚሻ። 

መዝሙረ ዳዊት ፹፭

አቤቱ ጆሮህን ወደ እኔ አዘንብል ስማኝ። እኔ ችጋረኛና ምስኪን ነኝና፤አቤቱ የዋህ ነኝና ነፍሴን ጠብቃት፤ አምላኬ ሆይ ባንተ ያመነ ባርያህን አድነው። አቤቱ ዘወትር ወደ አንተ እጮኻለሁ ይቅር በለኝ። የባርያህን ነፍስም ደስ አሰኛት፤ ነፍሴን ወደ አንተ አነሳለሁና፤ አቤቱ አንተ ቸር ይቅር ባይ ነህና አቤቱ ለሚጠሩህ ሁሉ ይቅርታህ ብዙ ነው። አቤቱ ጸሎቴን አድምጥ የልመናዬንም ነገር አስተውል። ሰምተኸኛልና በመከራዬ ቀን ወደ አንተ እጮኻለሁ። አቤቱ ከአምላኮች ወገን የሚመስልህ የለም። እንደ ሥራህም ያለ ሥራ የለም፤የፈጠርኻቸው አሕዛብ ሁሉ ይምጡ አቤቱ በፊትህ ይስገዱ፤ስምህንም ያመስግኑ፤ድንቅን የምታደርግ ታላቅ አንተ ነህና እግዚአብሔር ሆይ አንተ ብቻ ታላቅ ነህ። አቤቱ መንገድህን ምራኝ በእውነትህም ልሂድ፤ ልቤም ስምህን በመፍራት ደስ ይበለው። አቤቱ አምላኬ ሆይ በፍጹም ልቤ እገዛልሃለሁ። ለዘላለምም ስምህን አመሰግናለሁ፤ ምሕረትህ በላዬ ታላቅ ናትና፤ነፍሴም ከታችኛዋ ሲኦል አድነሃታልና። አምላኬ ሆይ አመጸኞች በላዬ ላይ ቆሙ፤ የክፉዎችም ጉባኤም ሰውነቴን ፈለጓት፤ በፊታቸውም አላደረግሁም። አቤቱ አንተ ግን ይቅር ባይና መሐሪ ነህ፤ ከቁጣ የራቅህና ምሕረትህ የበዛ እውነተኛም ነህ። ወደ እኔ ተመልክተህ ይቅር በለኝ፤ ለባርያህ ኀይልን ስጠው፤ የገረድህንም ልጅ አድነው። ጌታ ሆይ የበጎ ምልክትን ከእኛ ጋራ አድርግ፤ አቤቱ አንተ ረድተህ ደስ እንዳሰኘኸን፤ ያደረግህልንን በጐ ነገር ጠላቶቻችን አይተው ያፍሩ ዘንድ። ውዳሴ አምላክ ዘእሑድ የንስሐ ጸሎት የመመኘቴ ጸሎት ጌታዬ መድኃኒቴ ኢየሱስ ሆይ እንግዲህ በኒህ ሁሉ አማላጅነት ወደ እኔ ና አትዘግይብኝ። ነፍሴና ልቤ ኢየሱስ ክርስቶስን ፈጥነህ ና በሉት። አፌ ኢየሱስ ክርስቶስን ና በለው። የጻድቅነት ፀሐይ ሆይ የነፍሴን ጨለማ አርቅልኝ። ሰማያዊ እሣት ሆይ በዓለማዊ ፍቅር ብርድ ለታሠረ ልቤ ያንተን የፍቅር ሙቀት ስጥልኝ። ጌታዬ ሆይ በወንጌል ለመቶ አለቃው ወደ ቤትህ እመጣለሁ ልጅህንም እፈውስልሃለሁ እንዳልኸው ማቴ. ፰፥፭-፲፫ ለነፍሴ ወደ አንቺ መጣለሁ እፈውስሻለሁ በልልኝ። ከእንግዲህ ወዲህ ክፉ እንዳልናገር አፌን ፈውስልኝ። ክፉ እንዳያይ ዓይኔን ፈውስልኝ። ክፉ እንዳይሠሩ ነፍሴንና ሥጋዬን ሁሉ ፈውስልኝ። ጌታዬ የእኔን የሎሌህን ክፋት ልትተወው ና አትዘግይብኝ፤ ቅዱስ መልአኬ ነፍሴን እጅግ የምትወድ ጠባቂዬ ሆይ ስለ እግዚአብሔር ምስጋናና ክብር ይህንን ኑዛዜ በቀኖና በትሕትና በኀዘን በፍቅር እንዳደርገው እገዘኝ። ስለ ኑዛዜ ምክር እንዲህ እያለ የኀዘን ጸሎት እያደረገ በትሕትና በልብ ይጸጸት። አቤቱ የጠራ የልቡናን ልቅሶ ስጠኝ። ጌታዬ ሆይ በእኔ የጸኑ እሾህና አሜከላን ክዳት ተንኮልንም አጥፋልኝ ዘወትር የሚያቃጥል ልቅሶን ስጠኝ። አቤቱ የሰይጣን ገንዘብ የሚሆን የኃጢአትን ጣዕም ሥር ከእኔ ነቅሎ የሚጥል ልቅሶን ስጠኝ። አቤቱ ከኃጢአት የሚመለሱ ሰዎችን ልቅሶን ስጠኝ። አቤቱ የቅዱሳንን ልቅሶን ስጠኝ። አቤቱ በኃጢአት ሳለ እንዳይሞት ስለ ራሱ ያለቀሰ የዳዊትን ዕንባ ስጠኝ። ጌታዬ ሆይ እንደኔ የበደለ የለምና እኔም እንደ ወደቅሁት አወዳደቅ የወደቀ የለምና፤ እኔ እንደ ተፈተንኩት የተፈተነ የለምና። የሠራኋትም ኃጢአት አንዲት ብቻ አይደለችምና። በኃጢአቴ የሌላውን ጽድቅ አጠፋሁ እንጂ። ጌታዬ ሆይ እኔ ሳላውቅ የፈጠርኸኝ አንተ ነህ። አንተ ጌታዬ የከበርኽ መምህር ኃያል ገናና ነህ፤እኔ ባሪያህ ግን የተናቅሁ ጐስቋላ ደካማ ነኝ። አፌ የሚሸት ነው፤ አንደበቴም ዲዳ ነው። እኔም ኃጥእ ነኝ፤ደካማ ነኝ፤ ልቤም የረከሰ ነው፤በቸርነትህ ተጠግቼ እጠራሃለሁ፤የጻድቁንና የኃጥኡን ጸሎት የክፉውንም የምትሰማ አንተ ነህና፤ ያለ አንተም ቸር የለምና እንደ አንተም ያለ ቸር የለምና እንደ አንተ ያለ ይቅር ባይ የለምና። ጌታዬ ሆይ የጸናች የእጅህ ሥራ ነኝና ስለ ኃጢአቴ ቸል አትበለኝ፤ አቤቱ ሥጋዬን አንጻው፤ ሕፀፄን አውቄ ከመጠኔ እንዳልወጣ፤አቤቱ ጠላት ድል እንዳይነሣኝ ኃይልን ስጠኝ። በክብርት ጥምቀትህ የተሠራች ቤት ሥጋዬን እንዳያፈርሳት በከፋች ኃጢአት እንዳያሳድፈኝ ስለ ኃጢአቴ ሥርየት ወደ አንተ እማፀናለሁ። አቤቱ ነፍሴ እንዳትጐዳ አደራህን። ጌታዬ ኢየሱስ ክርስቶስ ሆይ ስለ ጕስቍልናዬና ስለ ጉዳቴ እማፀናለሁ፤ስለ ኀዘኔና ስለ መከራዬ በአንተ እማፀናለሁ። ስለ መልኬ ጥፋትና ስለ በደሌም በአንተ እማፀናለሁ። ብሩህ ሁኜ ሁሉን እንዳላይ የጠቈርሁ ኃጥእ ነኝና ላልተመለሱ ፍርድህንና ሞትን ማሰብ ስጠኝ። አቤቱ በደሌንና ነውሬን የሚያጥብ ዕንባ ስጠኝ። አቤቱ አንተን የሚያገለግል ዕንባን ስጠኝ። አቤቱ ልዩ ዕንባን ስጠኝ። አቤቱ ቁጡ ዕንባን ስጠኝ። አቤቱ ኀዘኔን የሚያርቅልኝንና የፊቴን ጥቁረት የሚያጥብልኝ ዕንባን ስጠኝ። አቤቱ ከዓይኔ ፈስሶ የአካሌን እድፍ የሚያጥብልኝ ዕንባን ስጠኝ። አቤቱ አንተን ደስ የሚያሰኝ ደስ ብሎህ የምትቀበለው ዕንባን ስጠኝ። የተነሳሕያንን ዕንባ የምትቀበል ሆይ፤ ወንድማቸውን ከመቃብር እስክታስነሣላቸው ድረስ ሳያቋርጡ እንዳፈሰሱት እንደ አልዓዛር እኅቶች ያለ ዕንባን ስጠኝ። ዮሐ. ፲፩፥፭-፵፬ አንተ የተቀበልከው ጽኑ ልቅሶን እንደ አለቀሰ እንደ ጴጥሮስ ያለ ዕንባን ስጠኝ። ከንጹሓን እግሮችህ ላይ ዕንባዋን አፍስሳ በራሷ ፀጕር እንደ አሸችው እንደ ሴሰኛይቱ ሴት ያለ ልቅሶን ስጠኝ። ልቅሶዋም ስለ ንስሐዋና ስለ ሕይወቷ ሆነ። ማቴ.፳፮፥፮-፲፫ ዮሐ.፲፩፥፩-፫ ፲፪፥፩-፰ ልጅዋን እንደ አስነሣህላት እንደ ጐስቋላዪቱ ድኃ ልቅሶ ያለ ዕንባን ስጠኝ። አልጋዬን በዕንባዬ አርሰዋለሁ ምንጣፌንም በዕንባዬ አጥበዋለሁ ብሎ በስድስተኛው መዝሙር እንደ ተናገረ እንደ ዳዊት ያለ ዕንባን  ስጠኝ። መዝ. ፮፥፮ አቤቱ እንደ አባቶቼ መምህራን ያለ ዕንባን ስጠኝ። እንደ ተነሳሕያን ኃጥአንም ዕንባን ስጠኝ።አቤቱ እንደ ባሕር በምትፈስ ዕንባ እጠበኝ። አቤቱ ጌታዬ ሆይ የተዘጋ ደጅን ክፈትልኝ።ጌታዬ ሆይ የማያቋርጥ የዕንባን ምንጭ ክፈትልኝ፤ አቤቱ የማያቋርጥ የዕንቦች ጐርፍን አፍስልኝ። ስለ በደሌና ስለ ኃጢአቴ ብዛት ስለ ነፍሴም ጉዳት የንግድ ገንዘብ ስለሚሆን ስለ ራሴም ጥፋት አቤቱ ይቅር በለኝ። ጌታዬ ሆይ ነፍሴ ከሥጋዬ እስክትለይ እርዳኝ። የተበላሸች የወይን ቦታ ስለ መልካም ፍሬ ፈንታም ርኵስ ፈቃዴና ኃጢአቴ የሰለጠኑባትን አርማት ኰትኵታት። ጌታዬ ሆይ ወደ መመቸቴ ፈቃድ አታግባኝ። ፍርድህንም ፈርቼ ነፍሴን ከፊትህ ጥያታለሁ። አቤቱ ከይቅርታህ ለምመጸወት ድኃ እዘንልኝ። ከርኅራኄህ ትሩፋት የምለምን ችግረኛህንም አታሳፍረኝ። በበደሌና በኃጢአቴ መታደስ እኔ ወራዳ ድኃ ነኝና በከሃሊነትህ ከኃጢአት እድፍ አንጻኝ። ስምህን ለሚወዱ ለባሮችህ ባዘጋጀኸው በንስሐ ዕንባ እጠበኝ። አቤቱ ኃፍረቴንና ኃሣሬን ሠውራት። በፍጥረቱ በምትፈርድበት ጊዜ የናዝሬቱ ኢየሱስ ክርስቶስ ሆይ ልመናዬን ስማኝ፤ፈጣሪዬ ሆይ ፊትህን ከልመናዬ አትመልስ። ልቅሶዬን ተቀበል ዕንባዬንም አታሳፍር። እኔ ጥገኛህ ነኝና ጌታዬ ሆይ ስለ ኃጢአቴ ብዛት እገዛልሃለሁ፤ጌታዬ ሆይ እስከ ዘመኔም ፍጻሜ ክቡር ስምህን አመሰግናለሁ ኪሩቤል ሱራፌልም የመላእክትም ሠራዊት ሁሉ አንተን ያመሰግናሉ። ለዘላለሙ አሜን በእውነት ይደረግልን። 

የዳዊት መዝሙር ፻፳

ዓይኖቼን ወደ ተራራ አነሣለሁ፤ ረድኤቴ ከወዴት ይመጣልኛል፤ረድኤቴስ ሰማይና ምድርን ከፈጠረ ከእግዚአብሔር ዘንድ ነው። ለእግሮችህ መሰናክልን አይሰጣቸውም የሚጠብቅህ አይተኛም፤ እነሆ እስራኤልን የሚጠብቅ አይተኛም አያንቀላፋም። እግዚአብሔር ይጠብቅህ፤ እግዚአብሔር በቀኝ እጁ ይሠውርህ፤ ፀሐይ በቀን አይተኩስህ፤ በሌሊትም ጨረቃ አይምታህ፤እግዚአብሔር ከክፉ ሁሉ ይጠብቅህ፤ ነፍስህንም ይጠብቃትም፤ እግዚአብሔር በመውጣትህና በመግባትህ ይጠብቅህ፤ ከዛሬ ጀምሮ እስከ ዘላለሙ ድረስ። 

ከመተኛት በፊት የሚጸለይ ጸሎት መዝሙረ ዳዊት ፻፵፪

አቤቱ ጸሎቴን ስማ በእውነትህ ልመናዬን አድምጥ በጽድቅህም መልስልኝ። ሕያው ሁሉ በፊትህ ጻድቅ አይደለምና ከባሪያህ ጋር ወደ ፍርድ አትግባ። ጠላት ነፍሴን አሳድዶአታል ሕይወቴንም በምድር ውስጥ አጐስቍሎአታል፤ ቀድሞ እንደ ሞተ ሰው በጨለማ አኑሮኛል። ነፍሴ በውስጤ አለቀችብኝ፤ልቤም ውስጤ ደነገጠብኝ። የቀድሞውን ዘመን አሰብሁ ሥራህንም ሁሉ አሰላሰልሁ የእጅህንም ሥራ ተመለከትሁ። እጆቼን ወደ አንተ ዘረጋሁ፤ ነፍሴም እንደ ምድረ በዳ አንተን ተጠማች። አቤቱ ፈጥነህ ስማኝ፤ ነፍሴ አልቃለች፤ ፊትህን ከእኔ አትመልስ፤ ወደ ጕድጓድም እንደሚወርዱ አልሁን። አንተን ታምኛለሁና በማለዳ ምሕረትህን አሰማኝ፤ አቤቱ ነፍሴን ወደ አንተ አንሥቻለሁና የምሄድበትንም መንገድ አስታውቀኝ። አቤቱ ወደ አንተ ተማፅኛለሁና ከጠላቶቼ አድነኝ። አንተ አምላኬ ነህና ፈቃድህን ለማድረግ አስተምረኝ፤ቅዱስ መንፈስህም በጽድቅ ምድር ይምራኝ። አቤቱ ስለ ስምህ ሕያው አድርገኝ፤ በጽድቅህም ነፍሴን ከመከራዋ አውጣት። በምሕረትህ ጠላቶቼን ደምስሳቸው፤ እኔ ባሪያህ ነኝና ነፍሴን የሚያስጨንቋትን ሁሉ አጥፋቸው። ክብር ምስጋና ይሁን አንድ አምላክ ለሚሆን ለአብ ለወልድ ለመንፈስ ቅዱስ ዛሬም ዘወትርም ለዘላለሙ አሜን። ሃሌ ሉያ ምስጋና ለእግዚአብሔር ሃሌ ሉያ በየጊዜው በየሰዓቱ ምስጋና  ለእግዚአብሔር አምላካችን። እነሆ መዓልቱ አልፎ ሌሊቱ ተተካ ቅዱስ ሆይ ስለዚህ አመሰግንሃለሁ፤ ወደ አንተም እለምናለሁ። የምትመጣውንም ሌሊት ያለፍርሃት እንዳሳልፋት ጠብቀኝ፤ አንተ እግዚአብሔር የማይታዩትን የጠላቶቼን የዲያብሎስን ሠራዊት ምክር ታውቃለህ የሥጋዬንም ደካማነት በአንተ በፈጣሪዬ ዘንድ የታወቀ ነው። ስለዚህ በቸርነትህ በክንፍህ ጥላ ሸፍነህ እንድትጠብቀኝ ነፍሴን በእጅህ አደራ እሰጥሃለሁ ለመሞት እንዳልተኛ ዓይነ ልቡናዬን በመለኮታዊ ቃልህ አብራልኝ ከጨለማው እንቅልፍ አንቅተህ አንተን ለማመስገን አዘጋጀኝ። አንተ ሰውን የምትወድ ቸር አምላክ ነህና። ሁልጊዜ ቅድስት ድንግል ንጽሕት የሆንሽ የክርስቶስ እናት ድንግል ማርያም ሆይ ነፍሴን ያድናት ዘንድ ጸሎትን ወደ ልጅሽ ወደ ወዳጅሽ ወደ ክርስቶስ አቅርቢልኝ። ጌታዬና አምላኬ እግዚአብሔር ሆይ በመዓልት (በቀን) ከሚወረወር በሌሊትም ከሚጣል ክፉ ሥራ ሁሉ በቸርነትህ ሰውረኝ። አቤቱ ጌታዬ ሆይ በዚህች እለት የበደልኩትን በቃልም ቢሆን፣ በሀሳብም ቢሆን፣ በሥራም ቢሆን፣ በድፍረትም ቢሆን፣ በግልጽና በስውርም ቢሆን የበደልኩህን ሁሉ እንደ ቸርነትህ ብዛት ይቅር በለኝ። በምሕረትህም ኃጢአቴን አስተሥርይልኝ። ስለ ቅዱስ ስምህ ብለህ ሕይወት ያለው እንቅልፍን ስጠኝ ከክፉ ነገርም የሚጠብቀኝን መልአከ ሰላምን ላክልኝ ጸጋና ምሕረትህ ይብዛልኝ። ለአንድ ልጅህ ለጌታችን ለመድኃኒታችን ለኢየሱስ ክርስቶስና ማሕየዊ ለሚሆን ለመንፈስ ቅዱስ በአንድነት ሁልጊዜ ምስጋና አቀርባለሁ አሜን። ክብር ምስጋና ይሁን አንድ አምላክ ለሚሆን ለአብ ለወልድ ለመንፈስ ቅዱስ ዛሬም ዘወትርም እስከ ዘላለሙ ድረስ አሜን።